ధర్మ సందేశం

ఒకావిడ ప్రశ్నలు జవాబులు శీర్షికలో అడిగింది.  తిండి, నిద్ర లాగే సెక్స్ కూడా చాలా సహజమైన ప్రాధమిక శారీరక అవసరం కదా.  మరి మిగిలిన వాటిపై రానన్ని పుస్తకాలు, సినిమాలు, సీరియల్స్ సెక్స్‌కి సంబంధించి మాత్రమే ఎందుకు వస్తున్నాయి? వాటిపట్ల వయోభేదం లేకుండా వెర్రి ఆసక్తి ఎందుకు చూపుతున్నారో తెల్పగలరు.
జవాబు: తిండి, నిద్ర లాగా సెక్స్ ఒకరితో అయ్యే పని కాదుకాబట్టి.

కుందేలు తెలివి

చిన్నప్పుడు పంచతంత్ర కథలు చదివేటప్పుడు జంతువుల తెలివితేటలగూర్చి అంతగాఅవగాహన లేకపోయినా జీవితంలో చూసిన సంఘటనలు ఔరా అవినిజంగానే జరిగినవా అనిపిస్తుంటాయి. కాని జీవితంలో ఎదురయ్యే సంఘటనలు మాత్రం అవి మాట్లాడలేకపోయినా తెలివితేటలను ప్రదర్శించడం మనం అనేకరకాలుగా చూస్తూనే ఉన్నాము. అందరూ కాకపోయినా కొందరయినా చూసే సంఘటనలను చెప్పుకోవాలంటే పశువులేవైనా చనిపోతే తోటి పశువులు ఏడవడమే కాకుండా కన్నీరుపెడ్తూ తాళ్ళుతెంపుకుని దానితోబాటే వెళ్ళాలని ప్రయత్నం చేస్తాయి. ఏదైనా పిచ్చుక చనిపోతే తోటి పిచ్చుకలు వాగులొ స్నానం చేయడం నేను కళ్ళారా అనేక సార్లు చూసాను. వాటికి దెబ్బతగిలినపుడు మిగిలిన జంతువులు నాలుకతో నాకి స్వాంతన కలిగిస్తాయి. సరే నేర పరిశొధనలో కుక్కల తెలివితేటల గూర్చి చెప్పుకోనవసరం లేదనుకుంటా. ఇవన్నీ ఒక ఎత్తైతే నేను చూసిన ఒక సంఘటన ఇప్పటికీ నా స్మృతి పధంలో మెదులుతూనే ఉంది.
ఓక రోజు తెల్లవారుఝామునే లేచి ఆపరేషన్ చేయడానికి అమరావతి కైనెటిక్ హోండాపై బయలుదేరాను. ఒక నాలుగున్నర కిలోమీటర్లు ప్రయాణం చేసాక రోడ్డు ప్రక్కన పొదలలోనుండి ఒక పెద్ద కుందేలు ఒక్కసారిగా చెంగున దూకి స్కూటరుపై పడి రహదారిపై  పడిపోయింది. ఆ దెబ్బతో నా మనసంతా వికలమైపోయి హఠాత్తుగా బ్రేక్ వేసి ఆగాను. అచ్చట చూద్దునుగదా ఒక గోధుమ రంగు కుందేలు రహదారిపై పడి గిలగిలా నాలుగు కాళ్ళు తన్నుకుంటూ ఉంది. దాన్ని చూసి నా మనసు చాలా బాధపడి ఏమి చేయాలో పాలుపోక మనసు పరిపరివిధాల ఆలోచింపసాగింది. దానికి వైద్యం చేయించాలా, బ్రతుకుతుందా లేదా, ప్రొద్దున్నే ఇదేమి బాధరా బాబూ అనుకుంటూ దాన్ని రహదారి మధ్యనుండి తీసి ప్రక్కనన్నా పడుకోపెడదాం, లేకపోతే మరలా ఏదో ఒక బండి దానిమీదగాపోయి చంపుతుందనిపించింది. దాని నాల్గుకాళ్ళు పట్టుకొని ప్రక్కన పరుండబెట్టటానికి ప్రయత్నం చేస్తే నన్ను పట్టుకోనివ్వకుండా చాలావేగంగా కాళ్ళను కొట్టుకోసాగిండి. ఎలాగో తంటాలుపడి కాళ్ళు పట్టుకొని ప్రక్క పొదలలొ మెత్తని చోటు చూసి పడుకోబెట్టడం జరిగింది. మనసులో ఎంతో బాధతో అచ్చటినుండి వెళ్ళడానికి వెనుతిరిగి స్కూటరువద్దకు వెళ్ళానోలేదో ఆ టక్కరి కుందేలు ఒక్కసారిగా లేచి ఎంతో వేగంగా తుప్పల్లోకి పరుగోపరుగు. నానుండి తప్పించుకోవడానికి ఆ అల్పజీవి ఎంతతెలివిగా నన్ను మోసం చేసిందో ఇప్పటికీ నాకాదృశ్యం కనులముందు కనబడ్తూనే ఉంటుంది.
అదండీ మా తెలివిగల కుందేటి కధ.

బుజ్జాయి జననం…..

పల్లెటూరిలో పుట్టిన ప్రతి ఒక్కరికి సాటి మనుషులతోనే కాకుండా ప్రకృతితో, పశువులతో, పక్షులతొ, పెంపుడు జంతువులతో చక్కని అనుబంధం ఉంటుంది. ఒక మొక్క పెట్టి చిగురిస్తున్నప్పుడుగాని, ఒక గింజ నాటి మొలక వచ్చినప్పుడు, చిగురు వెసినప్పుడు, కొత్తగా పూవు పూసినపుడు, కాయ కాసినపుడు, అది పండై నిగనిగలాడుతూ చెట్టుకు వేలాడుతున్నపుడు చూసి స్పందించని పిల్లవ్వడు గాని, పెద్దలుగాని ఉండరంటే అతిశయోక్తి కాదు. ఒక కోడి పిల్ల గుడ్డులోంచి బయటికి వచ్చినప్పుడు, ఒక పిచ్చుక పిల్ల గూడు లోంచి తొంగి చూసినప్పుదు, పెంపుడు కుక్క ఈనినప్పుడు పుట్టిన బుజ్జి బుజ్జి పిల్లల్ని చూసినప్పుడు, నిన్నటివరకూ పాలిచ్చి చూడిమోసి రేపోమాపో ఈనడానికి సిద్దంగా ఉన్న ఆవునో, గేదెనో చూసినప్పుడు ఏదో అవ్యక్తమైన ఆనందాన్ని పొందని హ్రుదయం ఒకప్పుడు ఉండేది కాదంటే ఈతరం పిల్లలు, పెద్దలు నమ్మరేమో. పిచ్చుక పిల్లలకు, కోడి పిల్లలకు నూకలు ఆహారంగా పెట్టడం, కుక్క పిల్లల్ని ఎత్తుకుని, లాలించి వాటికి తల్లిదగ్గర పాలు త్రాగించి ఆనందించడం ప్రతి పల్లెటూరి పిల్లవానికి అనుభవమే. గేదో, ఆవో ఈనుతుంటే అందరూ దగ్గరచేరి ఎప్పుడు ఈనుతుందా అని ఎదురు చూడడం, పెయ్యిదూడొ, దున్న పిల్లో, కొడె దూడో అని, అది ఎలా ఉంటుందొ అంటే రంగు ఎలాఉంటుందో, వంటిమీద చుక్కలుంటవా, సుడులుంటవా  అనుకుంటూ కాలక్షేపం చేస్తూ దాని పుట్టుక కోసం ఎదురుచూస్తూనే ఉంటారు. ఆ సమయం రాగానే దూడను ముందుగ ముక్కులు పిండుతారు. (అంటే ముక్కులోనున్న తెమడనంతా శుభ్రం చేస్తారు.) తరువాత గోళ్ళు గిల్లి (అవి మెత్తగా ఉంటాయి) తల్లికి తినిపిస్తారు. ఒంటికున్న తడినంతా తల్లి నాలుకతొ శుభ్రం చేస్తుంది. తరువాత బొడ్డుకు గుడ్డ కట్టి కాకులు పొడవకుండా చూస్తారు. ఫుట్టిన కాసేపటికే ఆ దూడ (ముద్దుగా బుజ్జాయి అని పిలుస్తారు) లేవడానికి ప్రయత్నం చేస్తుంది. అయితే క్రింద పడిపోతుంటుంది. అయినా లేవడానికి ప్రయత్నం మాత్రం మానదు. ఈ లోపు బుజ్జాయి నోట్లో వేలుపెట్టి చీకిస్తారు (రొమ్ముపట్టి పాలు త్రాగడం అలవాటు చేయడానికి). కాసేపాగి తల్లి పొదుగువద్దకు తీసుకెళ్ళి పాలు కుడిపించే ప్రయత్నం చేస్తారు.
ఇదంత ఎందుకు వ్రాస్తున్నానంటే ఈ మధ్య ఒక రోజు మాసొంత ఊరు ముళ్ళపూడి వెళ్ళినప్పుడు చాలా సంవత్సరాల తరువాత బుజ్జాయి పుట్టినపుడు చూసి దాని చేష్టలను వివిధ దశలలో ఫొటొలను తీయడం జరిగింది. వాటిని వరుసగా సమయంతో సహా ఇస్తున్నాను.

 

 

చివరిఫొటోలో దాన్ని తాడుతో కాలును కట్టివేయడం చూడవచ్చు. ఎందుకు కట్టివేసారో తెలుసా!!!!  ఆ బుజ్జాయి…….. చుట్టూచేరిన మగ పిల్లల వెనుక పాలు త్రాగడానికి వెంటపడి వెంటపడి నోరుతెరిచి కుమ్మడం మొదలుపెట్టింది గనుక. అంతటి తుంటరిదా బుజ్జాయి కనుకనే, ఆ సంఘటన నేను మరువలేదు కావుననే మీతో పంచుకుంటున్నాను.

మనవడి పెళ్ళి కోరిక

మూడేళ్ళ మనవడితో నా సంభాషణ:

పండూ ఏం సినిమా చూసావురా?

ఖుషీ తాతయ్యా!

ఎవరున్నారురా అందులో?

భూమిక తాతయ్యా!

ఎలాఉందిరా భూమిక?

చాలాబాగుంది తాతయ్యా!

చేసుకుంటావా?

ఆ  చేసుకుంటా తాతయ్యా!

ఇంతలో వాళ్ళమ్మ ఫోన్ తీసుకుంది ఏంటి బాబాయ్ వాడు అంటున్నాడూ అంటూ

నేను: నీ కొడుకు భూమికను చేసుకుంటాడంట. ఏమిచేసుకుంటాడంట బాబాయ్?

ఫక్కనున్నపండుగాడు పెద్దగా అరిచాడు ఏమని? పెళ్ళీళ్ళీళ్ళీళ్ళీళ్ళీళ్ళీళ్ళీ       అని.

“బుడ్డోడి ఫోజు”

ప్రొద్దున్నే వార్డులో రౌండ్సు కెళ్ళాను. అప్పటికి ఆరురోజులక్రితం పుట్టిన పసిబిడ్డడు తల్లి ఒడిలో బజ్జున్నాడు. వాడి ఫోజు చూస్తే తల్లి పొట్టలో ఉన్నట్లే ఉంది. మంచి అవకాశంకదాని కెమేరాకోసం పరిగెట్టి తీసుకొచ్చి చూస్తినిగదా వాడి ఫోజు మార్చేసి ఇదిగో ఇలా దర్శనమిచ్చాడు.